كوكتيل الأخبار

الناس اللي ما تابعتش أخبار على مدار يومين ونص:
**
الدنيا مقلوبة على الفنان أحمد العوضي عشان بيجسد دور الإرهابي هشام عشماوي فـ مسلسل "الاختيار" اللي خطفنا من أول حلقة وعامل انتشار فظيع (مش هنسيبك لازم تتعدم ياعوضي)
**
الإمارات أول دولة عربية تتجاوز مليون اختبار لفيروس كورونا، وراها من العرب السعودية، ومن آسيا تركيا والهند وإيران، والبلد اللي ما تتسماش
**
المسؤولين عن الدعاية لبنك مصر أذكياء وكل سنة بيدوروا على المطرب اللي عمل ضجة لما ظهر، وبيجيبوه لإعلانهم، العسيلي من 3 سنين ومكمل تقريبا واخد قرض بيسدده أغاني.. والسنة اللي فاتت مصطفى حجاج بعد ضجة "خطوة" و"يا بتاع النعناع"، والسنة دي بهاء سلطان بعد اللقاء المؤثر اللي طلعه مع الإعلامية إسعاد يونس، وعاصفة التعاطف معاه ومع موقفه ضد محتكره نصر محروس.. كده كده مدحت صالح مش محتاج كلام
**
الأخبار جاية من هنا وهناك عن وفاة زعيم كوريا الشمالية، لكن مفيش أخبار أكيدة من كوريا نفسها لحد دلوقتي.. والخبر الأخير عن رئيس جمعية الصداقة الكورية قالك كيم جونغ أون لسه عايش (المهم الدكتور اللي فشل فـ إنقاذه زمانه بيتعذب دلوقتي)
**
لكن بريطانيا ليها رأي تاني في مواجهة كورونا، هتوزع طارد للحشرات اسمه "سيتريوديول" على قواتها زي المطهرات كده، يرشوه لمنع انتشار #فيروس_كورونا، وهي خطوة أثارت جدلا بشأن جدواه
**
مصر النهارده بتواصل كسر حاجز الـ 200 إصابة، وسجلت 227 حالة و13 حالة وفاة، كده إجمالي 4319 والوفيات و307 وفيات وشفاء وخروج 1114 حالة.. والوزارة محتاجة تقدم تفسير لارتفاع الوفيات غير قصة إنهم بيوصلوا متأخر دي، خصوصا الدكاترة ضمن الوفيات!!
**
مدير مستشفى النجيلة الدكتور محمد علي نفى إصابته بفيروس كورونا وده خبر حلو، لكن اللي مش حلو، إنه أعلن توقف المستشفى عن استقبال مصابين جدد، لحد ما المستشفى ترتب أوضاعها، بعد إصابة 22 من الطاقم الطبي بالفيروس.. والتوقف ده ما وردش فـ بيان الصحة النهارده
**
وبمناسبة قارتنا العظيمة أفريقيا، فالمغرب لسه بتواصل وجودها فـ المركز التالت للإصابات ورا جنوب أفريقيا ومصر، وإصاباتها 3897 ووفياتها 159.. أما الجزائر فقررت تخفيف الإغلاق فـ بعض القطاعات وفتح المحلات التجارية (3256 إصابة و419 وفاة)
**
كنت بطلت أقول فقرة الأرقام الغبرة، لكن هرجع أقولها بناء على طلب الجماهير اللي هما اتنين صحابي.. أمريكا سجلت أكتر من 21 ألف إصابة جديدة و1268 وفاة وكده الإجمالي عندهم هيوصل مليون بعد يومين مثلا، والوفيات داخلة فـ 54 ألف (هيتسمى فـ التاريخ الفيروس الذي هزم أمريكا)..  أسبانيا داخلة فـ 224 ألف إصابة وحوالي 23 ألف وفاة.. وإيطاليا عدت 195 ألف إصابة وأكتر من 26 ألف وفاة.. وفرنسا تخطت 161 ألف إصابة وبتقرب من 23 ألف وفاة.. وألمانيا 156 ألف إصابة و5819 وفاة.. وبريطانيا 148 ألف إصابة وأكتر من 20 ألف وفاة..
**
تركيا السابع عالميا عدت 148 ألف إصابة و2706 وفاة.. وراها إيران 89 ألف إصابة و5650 وفاة.. وهنفوت الصين "جلابة المصايب".. أما روسيا فداخلة فـ 75 ألف إصابة و681 وفاة.. وبرازيل روماريو وبيليه ودي نيلسون عدت 57 ألف إصابة و3918 وفاة..
**
السعودية من ساعة ما زودت الاختبارات ونزلت عالأرض بتسجل كل يوم أكتر من ألف إصابة وده كويس، كده الخناقة والضرب شغال والقصة هتخلص قريب، يعني النهارده 1197 إصابة جديدة و9 وفيات والإجمالي 16 ألف إصابة وشوية و136 وفاة.. والإمارات 532 إصابة جديدة و7 وفيات بإجمالي 9813 إصابة و71 وفاة.. وقطر 833 إصابة بإجمالي 9358 إصابة و10 وفيات، مفيش وفيات النهارده.. والكويت اللي بتهاجم مصر فـ الرايحة والجاية كل اللي عندها شاكب راكب 2892 إصابة و19 وفاة..
**
بلجيكا وكندا وبيرو والمكسيك إصاباتهم فوق الألف.. وباكستان وسنغافورة وبيلاروسيا تحت الألف.. هولندا والبرتغال والسويد وتشيلي فوق الخمسمية
**
سوريا زي ماهي 42 إصابة و3 وفيات.. لبنان 704 إصابة و24 وفاة.. وفلسطين 495 إصابة و4 وفيات
**
رئيس وزراء بريطانيا بوريس جونسون قالك أنا خفيت من كورونا وراجع يوم الإثنين يابشر (أكيد عشان يلحق قبض أبريل الخلبوص)

قطر بعتت بيان لمجلس الأمن بتدعو فيه لإنهاء المقاطعة العربية من السعودية والإمارات والبحرين ومصر، وبتعتبره حل ملح جدا، ورغم إن البيان فيه شوية ألفاظ من نوعية إننا مظلومين والدول دي غلطانة فـ حقنا، إلا أن قطر بتطالب فـ الوقت اللي ماحدش من دول المقاطعة اتكلم قبل كده عن إنهاء المقاطعة أساسا
**
ورغم إن معظم الأندية الكبيرة لجأت لقصة تخفيض الرواتب، نادي تشيلسي قالك لأ، مش هنخفض لكن هنطالب اللعيبة بمواصلة التبرع للجمعيات الخيرية لمكافحة فيروس كورونا (الفكرة إن الحوار ده ما ينفعش مع اللعيبة البخيلة)
**
بيل جيتس حب يصعبها على العالم وقالك لازم كله ياخد لقاح كورونا عشان الحياة ترجع لطبيعتها.. وإحنا كنا لقيناه ياعم جيتس وقولنا لأ بصوت خالد الصاوي!!
**
المهم إن الرقابة لما اتفرجت على إعلان بوكسرات ميس حمدان وافقت عليه عادي وعاملة نفسي نايمة عالآخر
**
الخبر الطريف إن فريق من العلماء أطلق اسم شخصية "سالازار سليذرين" فـ أفلام هاري بوتر على نوع جديد من الثعابين الخضراء السامة فـ الهند، وده لأن الثعبان كان رمز منزل سليذرين.. وعايزين يزودوا الاهتمام بالنوع ده لأنه مهدد بالانقراض
**
لو وصلت بقى للسطر ده، بقولك اوعى ابنك يصبغ شعره زي رامز جلال، ولا يتفرج عالبرنامج من أساسه، عشان هتيجي تشتكي بعد كده من سلوكه العنيف مع صحابه.